Patriot tizimlari va raketa qurilmalari nishonda: Eron Quvaytdagi AQSh harbiy bazasiga hujum qildi
Avvalroq Bahrayndagi AQSh radar stansiyasi ham nishonga olingan edi.

Eron harbiylari Quvaytdagi AQSh qo‘shinlari foydalanadigan Ali al-Salim aviabazasiga dron hujumlari uyushtirilganini ma’lum qildi. Bu haqda Eronning IRNA axborot agentligi xabar berdi.
Eron tomonining bayonotiga ko‘ra, hujumlar aviabazada joylashgan Amerikaning Patriot havo mudofaa tizimlari va raketa uchirish qurilmalariga qaratilgan. Tehron ushbu bazani AQSh harbiylarining mintaqadagi harbiy va logistika faoliyati uchun muhim obyekt deb hisoblaydi.
Eron harbiylarining bayonoti Quvayt armiyasi havo mudofaasi kuchlari “dushman dronlari” hujumini qaytargani haqidagi xabardan keyin e’lon qilindi.
Eron ketma-ket ikkinchi kun AQSh harbiy obyektlariga zarba berganini bildirmoqda. 17-noyabr kuni Islom inqilobi qo‘riqchilari korpusi (IRGC) dronlari Bahrayndagi Shayx Iso aviabazasida joylashgan AQSh radar stansiyasiga zarba berganini ma’lum qilgan edi. Korpus bu harakatni AQSh dronlarining Eron havo hududiga kirib kelishiga javob sifatida izohlagan.
Bundan tashqari, o‘tgan hafta Eron rasmiylari Yevropa mamlakatlaridagi AQSh harbiy obyektlariga raketa zarbalari berilishi mumkinligi haqida tahdid qilgan edi.








