Toshkentdagi Umra mojarosi: Qirg‘iziston fuqarolariga qo‘shni davlatlar orqali safar qilmaslik aytildi
12-noyabrdan beri 104 nafar qirg‘izistonlik ziyoratchi Toshkentda qolib ketgan.

Qirg‘iziston musulmonlari diniy boshqarmasi 104 nafar qirg‘izistonlik ziyoratchining Toshkent xalqaro aeroportida qolib ketishi ortidan fuqarolarga vaqtincha qo‘shni davlatlar orqali Umra safariga bormaslikni tavsiya qildi. Bu haqda boshqarma rasmiy saytida ma’lum qilindi.
Qayd etilishicha, Qirg‘iziston musulmonlari diniy boshqarmasida Haj va Umra safarlariga tayyorgarlik ko‘rish bo‘yicha idoralararo komissiyaning favqulodda yig‘ilishi o‘tkazilgan. Unda Toshkent aeroportida Saudiya Arabistoniga ucha olmay qolgan fuqarolarning ahvoli va ularni vatanga qaytarish masalasi muhokama qilingan.
Yig‘ilishda Qirg‘iziston Tashqi ishlar vazirligi vakillari ziyoratchilarning Toshkentdagi holati haqida ma’lumot bergan. Shuningdek, mamlakatning O‘zbekistondagi elchixonasi vakillari bilan ularning xavfsizligi va ayni paytdagi ahvoli muhokama qilingan.
Komissiya «Nur Umra Travel» kompaniyasi faoliyatini ham ko‘rib chiqqan. Kompaniya rahbari vaziyat yuzasidan tushuntirish berish uchun yig‘ilishga taklif etilgan. Ziyoratchilar masalasini tezkor hal qilish va ularni Qirg‘izistonga qaytarish bo‘yicha tegishli choralar belgilangan.
Bundan tashqari, Qirg‘iziston muftiysi o‘rinbosari mamlakatning O‘zbekistondagi elchixonasi bilan birgalikda Toshkentga borib, fuqarolar bilan bevosita uchrashishi rejalashtirilgan. Kompaniya vakillaridan ham ziyoratchilar holidan xabar olish va muammolarni hal qilishda faol ishtirok etish talab qilingan.
Muftiyat fuqarolarni vaziyat barqarorlashguniga qadar Umra safariga boshqa qo‘shni davlatlar orqali bormaslikka, safar ma’lumotlarini oldindan aniqlashtirishga chaqirdi. Shuningdek, SalamAir, Air Arabia va Flyadeal aviakompaniyalari Bishkek va O‘sh xalqaro aeroportlaridan Saudiya Arabistoniga reyslarni amalga oshirayotgani ma’lum qilingan. Fuqarolarga safarlarini Qirg‘izistondan boshlash tavsiya etilgan.
Eslatib o‘tamiz, 104 nafar Qirg‘iziston fuqarosi 12-noyabrdan beri Toshkentda qolib, Saudiya Arabistoniga parvoz qilish imkoniyatini kutmoqda. Ular orasida keksalar va sog‘lig‘i bilan bog‘liq muammolari bor fuqarolar ham mavjud.







