Ukrainaga yana 45 milliard yevro: Yevropa Komissiyasi yangi yordam paketini taklif qildi
Bu mamlakatning kelgusi yilgi 70 milliard yevrolik moliyaviy ehtiyojining uchdan ikki qismini qoplaydi.
Yevropa Komissiyasi Ukrainaga 2027-yilda 45 milliard yevrogacha qo‘shimcha moliyaviy yordam ajratishni taklif qildi. Ushbu mablag‘ avval tasdiqlangan 2026–2027-yillar uchun 90 milliard yevrolik kredit dasturiga qo‘shimcha bo‘ladi.
Yevropa Komissiyasi prezidenti Ursula fon der Lyayen Bryusselda bo‘lib o‘tgan matbuot anjumanida Ukrainaga 2027-yilda jami 70 milliard yevro mablag‘ kerak bo‘lishini, yangi taklif esa ushbu ehtiyojning uchdan ikki qismini qoplashga qaratilganini ma’lum qilgan.
Uning so‘zlariga ko‘ra, qolgan 25 milliard yevro xalqaro hamkorlar tomonidan ta’minlanishi mumkin. Yevropa Komissiyasi Buyuk Britaniya, Norvegiya, Yaponiya va Kanada mablag‘larini jalb qilishni taklif qilmoqda.
Yevropa Komissiyasi Ukrainaga qo‘shimcha yordam mamlakatning kelgusi yilgi moliyaviy taqchilligini qoplash, aholi va infratuzilmani himoya qilish, shuningdek, maktablar va shifoxonalarning faoliyatini davom ettirishga yordam berishini bildirgan.
Yangi yordamni tasdiqlash uchun Yevropa Ittifoqiga a’zo 27 davlatning qo‘llab-quvvatlashi talab etiladi. Financial Times ma’lumotlariga ko‘ra, Vengriya, Slovakiya, Chexiya va Bolgariya Ukrainani keyingi moliyalashtirishda ishtirok etishga qarshi ekanini bildirgan.
Qonunchilik takliflari endi ko‘rib chiqish va qabul qilish uchun Yevropa Parlamenti hamda Yevropa Ittifoqi Kengashiga yuboriladi.








