Farg‘onada mast haydovchi ikki yo‘lovchini urib yubordi
U shundan so‘ng voqea joyidan qochib ketgan.
Farg‘ona viloyatida Damas urib yuborgan ikki yo‘lovchi halok bo‘ldi. Bu haqida Ichki ishlar vazirligi xabar berdi.
Bildirilishicha, holat Quva-Marg‘ilon-Marhamat yo‘lining Toshloq tumani Yakkatut mahallasidan o‘tuvchi ichki qatnov yo‘lida sodir bo‘lgan. 34 yoshli Damas haydovchisi spirtli ichimlik taʼsirida avtomashinani yuqori tezlikda boshqarib ketayotib, oldinda velosipedda ketayotgan fuqaroni urib yuborgan.
So‘ngra u qarama-qarshi yo‘nalishga chiqib ketib, yo‘l chetida onasi bilan ketayotgan 5 yoshli qizni ham urib, voqea joyidan qochib ketgan. Hodisa oqibatida qiz shifoxonada, 71 yoshli erkak esa hodisa joyida vafot etgan.
YTH yuzasidan jinoiy ish qo‘zg‘atilib, tergov harakatlari olib borilmoqda. Gumonlanuvchiga qamoq ehtiyot chorasi qo‘llangan.
