Ilon Mask TikTok raqobatchisini ishga tushirmoqchi
Bu AQSHda TikTok taqiqlanishi fonida yuz bermoqda.
Ilon Mask X (sobiq Tvitter) ijtimoiy tarmog‘ida qisqa videolar platformasi — Vineʼni qayta ishga tushirish imkoniyatini ko‘rib chiqmoqda. Ushbu reja AQSHda TikTokʼning taqiqlanishi fonida yuzaga kelgan bo‘shliqni to‘ldirishga qaratilgan.
2017 yilda yopilgan, 6 soniyali qisqa videolar bilan mashhur bo‘lgan Vine platformasi qisqa muddat ichida katta auditoriya to‘plagandi. Mask Vine funksiyasini X platformasiga integratsiya qilishni rejalashtirayotgani haqida gapirib, X ijtimoiy tarmog‘ini universal ilovaga aylantirish maqsadini bildirgan edi. Ushbu ilova xabar almashish, to‘lovlar, video va boshqa ko‘ngilochar xizmatlarni o‘z ichiga oladi.
Maʼlumotlarga ko‘ra, Vineʼni qayta tiklash katta resurslarni talab qiladi, ammo TikTok bo‘sh qoldirgan maydonni egallash uchun bu muvaffaqiyatli qadam bo‘lishi mumkin.
Bu Maskning Vineʼni qayta ishga tushirish bo‘yicha birinchi urinish emas. U 2022 yilda foydalanuvchilardan platformani qayta tiklash haqida fikr so‘ragan edi. Ayni paytda Maskning strategiyasi Meta kompaniyasining Instagramʼda qisqa video funksiyasini (Reels) ishga tushirishga o‘xshash deb baholanmoqda.
