Qashqadaryoda maktab direktori forma uchun pul yig‘moqchi bo‘ldi
Holat yuzasidan MMTB rasmiy munosabat bildirdi.
Ijtimoiy tarmoqda Qashqadaryo viloyati Qarshi shahrida maktab direktori maktab formasi uchun o‘quvchilardan pul yig‘ish bo‘yicha ko‘rsatma bergani aks etgan videomurojaat tarqalmoqda. Holatga viloyat maktabgacha va maktab taʼlimi boshqarmasi rasmiy munosabat bildirdi.
O‘tkazilgan o‘rganish jarayonida aniqlanishicha, maktab direktori F.Shuhratova haqiqatan ham 2025 yilning 21- yanvar kuni maktabning Telegram guruhiga videomurojaat qilib, barcha o‘quvchilarga “jaket” olinishi maqsadida ko‘rsatma bergan.
Natijada maktab direktori F.Sh. ga nisbatan boshqarma boshlig‘ining 2025-yil 22-yanvardagi tegishli buyrug‘iga asosan o‘rtacha oylik ish haqining yigirma besh foiz miqdorida “Jarima” intizomiy jazo chorasi qo‘llanilgan.
Shuningdek, maktab jamoasiga kelgusida ushbu holatlarga yo‘l qo‘ymaslik bo‘yicha tushuntirish berilib, maktab sinf rahbarlaridan tushuntirish xatlari olingan.
Taʼkidlanishicha, taʼlim tashkilotida majburiy tartibda o‘quvchilarni forma kiyishiga doir pul mablag‘larini yig‘ish, tashkil etish, qatʼiyan taqiqlanadi.
