Saida Mirziyoyeva O‘zbekistonning JSTga aʼzo bo‘lish jarayoni haqida maʼlumot berdi

Prezident yordamchisi Saida Mirziyoyeva O‘zbekistonning Jahon savdo tashkilotiga aʼzo bo‘lish jarayonidagi hozirgi holat haqida maʼlumot berdi. 2024-yilda mamlakat ushbu yo‘nalishda katta qadam tashladi.

 

“Bu Prezident Shavkat Mirziyoyev tomonidan olib borilayotgan qatʼiy iqtisodiy islohotlar natijasida amalga oshdi. Xususan, o‘tgan yili JST Ishchi guruhi ikkita muhim yig‘ilish o‘tkazdi. Bu bizga aʼzolikning asosiy hujjati – Ishchi guruh Hisoboti loyihasini tayyorlashga kirishishga imkon berdi. Shuningdek, AQSH, Xitoy va Yaponiya kabi 15 ta mamlakat bilan ikki tomonlama muzokaralar yakunlandi. Natijada O‘zbekiston hisobida 23 ta imzolangan bitim bor.

 

Qisqa vaqt ichida biznesni va raqobatni yanada shaffof qilish uchun 20 ta muhim qonun qabul qilindi” — deydi Saida Mirziyoyeva.

 

U tez orada Tashkilotning to‘laqonli aʼzosi bo‘lish uchun joriy yilda ham shu surʼatda davom etishini aytdi. Bu mamlakatning investitsion jozibadorligini oshirishi hamda o‘zbek biznesining mintaqaviy va global qo‘shilgan qiymat zanjirlariga kirib borishini taʼminlashi lozim.

 

“JSTga aʼzolik va davlat rahbari tomonidan olib borilayotgan islohotlarning yakuniy maqsadi, shubhasiz, xalqimiz farovonligini taʼminlash, unga munosib ish o‘rinlarini yaratish va iqtisodiyot boshqaruvini samaraliroq tizimga o‘tkazishdir”, — dedi Prezident yordamchisi.