“Uzbekistan Airways” 2 tilda xizmat ko‘rsatishi taklif qilindi
Bu vaqt tejalishiga xizmat qilishi mumkinligi aytildi.
“Milliy tiklanish” partiyasi yetakchisi Alisher Qodirov “Uzbekistan Airways” milliy aviakompaniyasining til siyosatini qayta ko‘rib chiqish zarurligini taʼkidladi.
Siyosatchining so‘zlariga ko‘ra, turizm nafaqat byudjetni to‘ldirish vositasi, balki mamlakat madaniyati va milliy o‘ziga xosligini targ‘ib qilishning samarali usulidir.
Deputat aviakompaniya nima uchun yo‘lovchilarga uchta tilda xizmat ko‘rsatishi kerakligi to‘g‘risida savol berdi.
“Yo‘lovchilarning 20 foizi ingliz, qolgan 75 foizi o‘zbek tilini tushunadi. 5 foiz tasodiflar bo‘lishi mumkin. Milliy aviakompaniya nima uchun yo‘lovchilarni qo‘shimcha vaqtini oladi? Hamma joyda uchta tilda, lekin avariya holatida samalyotdan chiqish eshiklaridan foydalanish haqidagi juda muhim qo‘llanma rus va ingliz tilida. Milliy kompaniyanida biroz milliy g‘urur bo‘lishi kerak, davlat tili va keng qo‘llaniladigan xalqaro tillardan bittasi ishlatilsa, vaqt ham tejalar edi”, — deya taʼkidladi Qodirov.
Qodirovning fikricha, “Uzbekistan Airways” davlat tiliga ko‘proq eʼtibor qaratishi kerak. U faqat o‘zbek va xalqaro miqyosda keng qo‘llaniladigan bitta tilni ishlatish nafaqat vaqtni tejashga, balki milliy madaniyat va o‘ziga xoslikka hurmat ko‘rsatishga yordam berishini taʼkidladi.
“Milliy aviakompaniya davlat tiliga va vaqtni oqilona ishlatishga nisbatan o‘z munosabatini qayta ko‘rib chiqishi kerak”, — dedi u.
Deputat milliy g‘ururni namoyon qilish milliy aviakompaniya uchun ustuvor vazifalardan biri bo‘lishi kerakligini taʼkidladi. Uning fikricha, bunday o‘zgarishlar O‘zbekistonning xalqaro maydondagi madaniy imijini mustahkamlashga xizmat qiladi.
