Bo‘stonliqda marixuana yetishtirilgan laboratoriya fosh bo‘ldi
U yerdan jami 200 tup marixuana o‘simligi aniqlangan.
“Toshkent-AERO” IBK Kontrabandaga qarshi kurashish shuʼbasi xodimlari tomonidan “Bosh pochtamt” TIF bojxona posti hamda DXX va Toshkent shahar IIBB, IXB xodimlari bilan hamkorlikda “Toshkent” xalqaro aeroporti” chegara bojxona posti kichik inspektor-kinologi B.Ro‘ziyevga biriktirilgan “Archi” laqabli xizmat iti ishtirokida poytaxtimizning Yunusobod tumanida tezkor tadbir o‘tkazildi.
O‘tkazilgan tezkor tadbir davomida Toshkent shahar Yunusobod tumanida istiqomat qiluvchi fuqaro 1 dona qog‘oz quti ichida bo‘lgan, Markaziy bojxona laboratoriyasi sud ekspertiza xulosalarida umumiy og‘irligi 886,426 gr etib ko‘rsatilgan marixuana giyohvandlik moddalari bo‘lgan kuryerlik jo‘natmasini qabul qilib olgan vaqtida to‘xtatib qolingan.
Ushbu fuqaroning Toshkent viloyati Bo‘stonliq tumanidagi dala hovlisi ko‘zdan kechirilganda esa, marixuana yetishtirish uchun mo‘ljallangan laboratoriya tashkil qilgani fosh bo‘ldi.
Dala hovlidan jami 200 tup marixuana o‘simligi hamda taxminan 5 kg og‘irlikdagi quritilgan marixuana kukunlari topilib, ashyoviy dalil sifatida vaqtincha saqlovga olindi.
Hozirda mazkur holat yuzasidan tergovga qadar tekshiruv harakatlari olib borilmoqda.
