40 turdagi allergiya bilan yashayotgan qiz
Shunga qaramay, u hayotga ijobiy qarashga harakat qiladi.
Xempshirlik 19 yoshli Xloya Remsi har kuni kurashadigan 40 dan ortiq turdagi allergiya haqida aytib berdi.
Xloya Remsi juda kam uchraydigan kasallik – akvagen urtikariya, yaʼni suvga allergiya bilan yashaydi. Uning tanasiga suv teggan zahoti terisi qichiydigan toshmalar bilan qoplanadi, bu esa unga terisida chumolilar o‘rmalayotgandek tuyuladi. Remsi bergan intervyusida bu holatning qanchalik azobli ekanini tasvirlab, baʼzida hatto terisini pichoq bilan qirib tashlash istagi paydo bo‘lishini tan oldi.
Xloya olti oyligidan boshlab turli allergiyalardan aziyat chekadi, ammo yaqinda unga "oziq-ovqat changi sindromi" tashxisi qo‘yildi. Bu uning organizmi turli mahsulotlarga, jumladan, banan, kartoshka, qulupnay, kivi, hatto jelatinli shirinliklar va atirlarga ham qanday reaksiya berishini tushuntirib beradi. Biroq suvga allergiya uning eng noodatiy va tushunarsiz kasalligi bo‘lib qolmoqda.
U hayotida suv bilan bog‘liq ko‘plab noxush voqealarni boshidan kechirgan. Masalan, bir safar poyezdni kutayotib, yomg‘ir ostida qolganida, uyga yetib kelguncha qattiq qichishish azobidan qiynalganini eslaydi: "Men giyohvandga o‘xshab qichishishdan to‘xtay olmasdim", – deydi u.
Xloya ko‘p marta hayoti uchun xavfli allergik reaksiyalar, jumladan, anafilaktik shok holatiga tushgan va shuning uchun bir necha bor shoshilinch tibbiy yordamga murojaat qilishga majbur bo‘lgan. Allergiyalarni nazorat qilish uchun u oyiga ikki marta maxsus inyeksiya qabul qiladi, ammo ular faqat qisman yordam beradi.
Shunga qaramay, u hayotga ijobiy qarashga harakat qiladi. Allergiyalarini kuzatish va ularning og‘irlik darajalarini tahlil qilish uchun Exsel jadvalida maxsus ro‘yxat yuritadi. Bu esa unga organizmining o‘zgarishlarini nazorat qilishga yordam beradi.
Xloyaning hikoyasi dunyoda kam uchraydigan, ammo hayotni sezilarli darajada qiyinlashtiradigan kasalliklarning mavjudligini yana bir bor isbotlaydi.
Komila Odilova tayyorladi
