Maymun sabab butun Shri-Lanka chiroqsiz qoldi
U 22 million aholining elektr ta’minotini izdan chiqardi.
“Maymun tarmog‘imizdagi transformator bilan o'ynagan va bu tizimda muvozanatsizlikni keltirib chiqargan”, — deb tushuntirdi Shri-Lanka energetika vaziri Kumara Jayakodi.
Ushbu hodisa yakshanba kuni ertalab soat 11 atrofida orolda to‘liq elektr ta’minotining uzilishiga sabab bo‘ldi.
Maymun uchun fojiali yakunlangan voqea Shri-Lanka poytaxti Kolomboning janubidagi elektr podstansiyasida yuz bergan.
Shundan so‘ng elektr ta’minotini qayta tiklash bosqichma-bosqich amalga oshirildi, avvalo, kasalxonalar va suv tozalash stansiyalariga elektr berildi.
Shri-Lanka ijtimoiy tarmoq foydalanuvchilari ushbu voqea yuzasidan turli hajviy izohlar va hukumatga qarshi kinoyali fikrlar bildirishdi.
“Daily Mirror” gazetasining dushanba kuni nashr etilgan maqolasida energetika bo‘yicha mutaxassislar yillar davomida ketma-ket almashib kelayotgan hukumatlarga elektr tarmoqlarini modernizatsiya qilish kerakligini aytib kelganini eslatdi.
“Shri-Lanka elektr tarmoqlarining holati shunchalik yomonki, hatto bitta elektr uzatish liniyasida muammo yuzaga kelsa ham butun mamlakat bo‘ylab elektr uzilishi mumkin”, — deya gazeta noma’lum muhandisning so‘zlarini keltirdi.
2022-yilda Shri-Lankada elektr uzilishlari muntazam sodir bo‘lgan, ammo bunga maymunlar emas, balki iqtisodiy inqiroz sabab bo‘lgan edi. Xabarlarga ko‘ra, iqtisodiy inqiroz tufayli mamlakat yoqilg‘i sotib olish uchun yetarli mablag‘ topa olmagan.
