Noqonuniy “Haj” va “Umra” safarlari fosh etildi
Rasmiy litsenziyasiz ziyorat tashkil etmoqchi bo‘lganlar jazolanadi.
Davlat xavfsizlik xizmati va Ichki ishlar vazirligi tomonidan joriy yilning yanvar-fevral oylarida o‘tkazilgan tezkor tadbirlar davomida fuqarolarni noqonuniy ravishda “Haj” va “Umra” ziyoratlariga yuborishga uringan bir nechta shaxslarning faoliyati fosh etildi.
Tezkor tadbir davomida 1969-yilda tug‘ilgan, Andijon viloyati Baliqchi tumanida istiqomat qiluvchi shaxs, mahalliy fuqaroning ishonchiga kirib, uning ota-onasini joriy yilgi “Haj” ziyoratiga jo‘natish evaziga 20 ming AQSh dollari talab qilgani va ushbu mablag‘ni olayotgan vaqtida ushlanganligi aniqlandi. Ushbu shaxs ziyorat safarlarini tashkil etish uchun zarur bo‘lgan rasmiy litsenziyaga ega bo‘lmagan.
Shuningdek, Namangan shahrida faoliyat yurituvchi turistik firmalardan birida ishlovchi, 1981-yilda tug‘ilgan shaxs ikki nafar fuqaroning “Haj” ziyoratiga borishini tashkil qilish evaziga 15 ming AQSh dollari talab qilib, oldindan 10 ming AQSh dollari olgan vaqtida qo‘lga olindi.
Xorazm viloyati, Gurlan tumanida yashovchi, 1974-yilda tug‘ilgan fuqaro Qoraqalpog‘iston Respublikasining Ellikqal’a tumanida yashovchi uch nafar fuqaro uchun Toshkent shahrida faoliyat yurituvchi, lekin ziyorat safarlarini tashkil qilish huquqiga ega bo‘lmagan firma orqali “Umra” ziyoratini uyushtirishga va’da bergan. U bu xizmat evaziga 3450 AQSh dollari talab qilib, ushbu mablag‘ni olayotgan vaqtida huquqni muhofaza qiluvchi organlar tomonidan qo'lga olingan.
Farg‘ona shahrida o‘tkazilgan tezkor tadbir davomida Toshloq tumanida yashovchi, 1981-yilda tug‘ilgan fuqaro rasmiy vakolatga ega bo‘lmagan holda “Umra” ziyoratini tashkil qilish bahonasida Qo‘shtepa tumanida yashovchi ikki nafar fuqaro uchun viza rasmiylashtirib berish evaziga 2400 AQSh dollari olayotganida qo‘lga olindi.
Quva tumanida yashovchi, 1980-yilda tug‘ilgan fuqaro Telegram messenjerida o‘zining ziyorat safarlarini tashkil qiluvchi firma borligini aytib, ikki nafar fuqaro uchun “Umra” vizasini rasmiylashtirish bahonasida 3100 AQSh dollari talab qilgan. U ushbu mablag‘ning 1800 AQSh dollarini oldindan olgan vaqtida huquqni muhofaza qiluvchi organlar tomonidan qo‘lga olindi.
Hozirda yuqoridagi barcha holatlar yuzasidan mazkur shaxslarga nisbatan tegishli jinoyat ishlari qo‘zg‘atilib, tergov harakatlari olib borilmoqda. Fuqarolarga, “Haj” va “Umra” ziyoratlarini faqatgina rasmiy tartibda vakolatli tashkilotlar orqali amalga oshirish tavsiya etiladi.
