Havoni ifloslantirganlik uchun javobgarlik belgilandi
Ekologik qoidalarni buzgan qurilish kompaniyalari jazolanadi.
O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqidagi qonun Senat tomonidan ma’qullandi. Ushbu o‘zgarishlar qurilish maydonlarida atmosfera ifloslanishining oldini olishga qaratilgan.
Amaldagi shaharsozlik qoidalarida chang va boshqa ifloslantiruvchi moddalar miqdorini kamaytirish uchun maxsus suv tizimlaridan foydalanish belgilangan. Biroq, shu kungacha havoni ifloslantirish uchun aniq javobgarlik choralari belgilanmagan edi.
Endilikda, atmosfera ifloslanishi belgilangan me’yorlardan oshsa, huquqbuzarlarga 10 bazaviy hisoblash miqdori (BHM) miqdorida jarima solinadi. Agar qonunbuzarlik bir yil ichida takrorlansa, jarima 50 BHMgacha oshiriladi.
Mazkur tartibga rioya etilishini nazorat qilish va qoidabuzarlarni javobgarlikka tortish vazifasi Davlat ekologik nazorat inspeksiyasi zimmasiga yuklatilgan.
