“O‘zgarishlarni eng murakkab joydan boshlash uchun bordik”: Saida Mirziyoyeva Qashqadaryodagi narkologiya muassasasida bo‘ldi
Mahalliy va xalqaro ekspertlar ishtirokida narkologiya tizimini tubdan yangilashga qaratilgan maxsus dastur ishlab chiqilishi ma’lum qilindi.
Saida Mirziyoyeva Qashqadaryo viloyati narkologiya muassasasi faoliyati bilan tanishdi. U sohadagi mavjud muammolarni o‘rganish va o‘zgarishlarni eng murakkab joydan boshlash maqsadida muassasaga tashrif buyurganini bildirdi.
Saida Mirziyoyevaning ta’kidlashicha, bemorlarni davolashda munosib sharoit va malakali tibbiy yordam bilan bir qatorda, samimiy munosabat va ruhiy qo‘llab-quvvatlash ham muhim ahamiyatga ega. Hech kim yordam so‘rashdan qo‘rqmasligi va o‘z muammosi bilan yolg‘iz qolmasligi kerak.
Saida Mirziyoyeva kasalliklarning oldini olish, davolash va reabilitatsiya jarayonlarini birlashtirgan, turli soha mutaxassislari hamkorlikda ishlaydigan tizim yaratish maqsad qilinganini qayd etdi.
Shuningdek, mahalliy va xalqaro ekspertlar ishtirokida narkologiya sohasini tubdan yangilashga qaratilgan maxsus dastur ishlab chiqilishi rejalashtirilmoqda. Unda inson qadri va bemorlarning sog‘lom hayotga qaytishiga ko‘maklashish ustuvor yo‘nalish bo‘ladi.
