Yangiyo‘lda ishchining halok bo‘lishi bo‘yicha sud hukmi chiqarildi
Korxona rahbari 2 yilga qamaldi.
Toshkent viloyati, Yangiyo‘l tumanidagi “Kavsar Madad” xususiy korxonasida sodir bo‘lgan ishchi o‘limi bilan bog‘liq hodisa bo‘yicha sud hukmi chiqarildi. 2024-yil 8-iyun kuni korxona ishchisi Xitoydan olib kelingan yuk ko‘tarish mexanizmini o‘rnatish jarayonida temir konstruktsiya boshiga tushishi natijasida vafot etgan.
Dastlabki tergovda hodisa baxtsiz tasodif sifatida baholangan bo‘lsa-da, marhumning yaqinlari holatni qayta ko‘rib chiqishni talab qilgan. Natijada, tergov davomida korxona rahbari ishchilar xavfsizligini ta’minlamagani uchun aybdor deb topildi.
Sud jarayonida ma’lum bo‘lishicha, zavod rahbari marhumning oilasiga moddiy yordam va’da qilgan, biroq keyinchalik bu majburiyatlarini bajarmagan. Guvohlarning ko‘rsatmalari qayta o‘rganilgach, voqea mehnat xavfsizligi qoidalarining buzilishi oqibatida sodir bo‘lgani aniqlandi.
Sud hukmiga ko‘ra, “Kavsar Madad” xususiy korxonasi rahbari Jinoyat kodeksining 257-moddasi 2-qismi “a” bandi (mehnatni muhofaza qilish qoidalarini buzish natijasida odam o‘limiga sabab bo‘lish) bilan aybdor deb topildi. Unga 2 yil muddatga ozodlikdan mahrum qilish hamda bir yil davomida tadbirkorlik faoliyati bilan shug‘ullanish huquqini cheklash jazosi tayinlandi.
