Drift va yo‘l bezoriligiga qarshi yangi chora-tadbirlar belgilandi
Qoida buzganlarga nisbatan katta jarima va haydovchilik huquqidan mahrum qilish joriy etildi.
2025-yil 21-fevraldan boshlab O‘zbekiston Respublikasida yo‘l harakati qoidalarini qo‘pol ravishda buzish, jumladan, drift qilish va yo‘l bezoriligi holatlari uchun yangi javobgarlik choralari belgilandi. Bu O‘zbekiston Respublikasining “Yo‘l harakati xavfsizligi tizimi takomillashtirilishi munosabati bilan Jinoyat, Jinoyat-protsessual kodekslariga hamda Ma’muriy javobgarlik to‘g‘risidagi kodeksiga qo‘shimcha va o‘zgartirishlar kiritish to‘g‘risida”gi qonuni asosida amalga oshirildi.
Toshkent davlat yuridik universiteti o‘qituvchisi Javohir Eshonqulovning ma’lumotiga ko‘ra, yangi tartibga muvofiq quyidagi huquqbuzarliklar uchun ma’muriy javobgarlik belgilangan:
- Transport vositasini qasddan sirpantirib boshqarish (drift qilish),
- Boshqa haydovchilarga qasddan to‘sqinlik qilish,
- Yo‘lda keskin va uzluksiz harakatlanish,
- Yo‘lovchilar hayotiga xavf tug‘diruvchi harakatlarni amalga oshirish.
Mazkur qoidabuzarliklar uchun quyidagi sanksiyalar qo‘llanadi:
1. Drift va yo‘l bezoriligi sodir etgan haydovchilarga – bazaviy hisoblash miqdorining 25 baravari (9 mln 375 ming so‘m) miqdorida jarima yoki 1 yildan 2 yilgacha haydovchilik huquqidan mahrum qilish jazosi.
2. Agar ushbu huquqbuzarlikni haydovchilik guvohnomasiga ega bo‘lmagan yoki undan mahrum etilgan shaxs sodir etsa – eng kam oylik ish haqining 50 baravari (18 mln 750 ming so‘m) miqdorida jarima yoki 15 sutkagacha ma’muriy qamoq jazosi.
3. Guruh bo‘lib harakat qilib, yo‘l harakati xavfsizligiga tahdid solgan shaxslarga – bazaviy hisoblash miqdorining 3 baravaridan 5 baravarigacha (1 mln 875 ming so‘mdan yuqoriga) jarima.
Mazkur qonun yo‘l harakati xavfsizligini ta’minlash va noqonuniy harakatlarning oldini olishga qaratilgan.
