Toshkent viloyatida rekord og‘irlikdagi chaqaloq dunyoga keldi
Chaqaloq 7 kg 3 gramm vaznida tug'ilgan.
Toshkent viloyatining Yangiyo‘l shahridagi tumanlararo perinatal markazida vazni 7 kilogramm 3 gramm bo‘lgan chaqaloq dunyoga keldi. Qizaloqning ahvoli qoniqarli deb baholanmoqda.
Shifokorlarning ma’lumotiga ko‘ra, ona kesarcha kesish orqali farzandini dunyoga keltirgan. Bu uning to‘rtinchi farzandi hisoblanadi. Viloyat sog‘liqni saqlash boshqarmasi boshlig‘ining o‘rinbosari Feruza Rahmatullayeva aytishicha, hozirda ona va chaqaloq shifokorlar nazoratida.
Eslatib o‘tamiz, bunday noyob holat o‘tgan yilning noyabr oyida ham Nurobodda kuzatilgan bo‘lib, u yerda deyarli 7 kg vaznga ega o‘g‘il bola dunyoga kelgan edi.
Mutaxassislar bunday vaziyatlar kamdan-kam uchrashini ta’kidlamoqda va chaqaloqning sog‘lig‘i doimiy tibbiy nazoratda bo‘lishini bildirgan.
