Yaponiyada yirik o‘rmon yong‘ini kuzatilmoqda
Bu 1992-yildan beri kuzatilgan eng yirik o‘rmon yong‘ini hisoblanadi.
Yaponiyaning shimoli-sharqidagi Ivate prefekturasida 1992-yildan beri kuzatilgan eng yirik o‘rmon yong‘ini beshinchi kun davom etmoqda. Yong‘in hududi oxirgi 24 soat ichida yana 300 gektarga kengayib, umumiy zararlangan maydon 2,1 ming gektarga yetdi.
Hozirgacha yong‘in oqibatida bir kishi halok bo‘lgani tasdiqlangan, bedarak yo‘qolganlar soni aniqlanmoqda. Yong‘in 90 ga yaqin turar-joy va tijorat binolarini yo‘q qilgan yoki jiddiy shikast yetkazgan.
Favqulodda vaziyat tufayli 5 mingga yaqin aholi evakuatsiya bo‘yicha tavsiyalar oldi, ulardan 1,2 ming nafari maxsus markazlarga ko‘chirildi. Shuningdek, 1,8 mingga yaqin bino elektr ta’minotisiz qoldi.
Mahalliy hukumat va o‘t o‘chirish xizmatlari yong‘inni o'chirishga harakat qilmoqda, ammo uning tarqalish sur’ati hamon yuqori.
