Prezident O‘zbekistonga yangi tayinlangan elchilarni qabul qildi
Davlat rahbari ulardan ishonch yorliqlarini qabul qilib oldi.
Bugun, 6-mart kuni Shavkat Mirziyoyev Misrning favqulodda va muxtor elchisi Tamer Fati, Italiyaning favqulodda va muxtor elchisi Pergabriel Papadiya de Bottini, Qirg‘izistonning favqulodda va muxtor elchisi Duyshonqul Chotonov, Belarusning favqulodda va muxtor elchisi Aleksandr Ogorodnikov, Gruziyaning favqulodda va muxtor elchisi David Kotariya va Turkiyaning favqulodda va muxtor elchisi Ufuk Ulutashdan ishonch yorliqlarini qabul qilib oldi.
Davlat rahbari diplomatik vakolatxonalar rahbarlarini O‘zbekistondagi faxriy missiyasi boshlangani bilan samimiy tabrikladi. Dunyoda mojarolar keskinlashib, geosiyosiy raqobat kuchayib borayotgan hozirgi davrda do‘st davlatlarning bir-birini qo‘llab-quvvatlashi har qachongidan ham muhim ekani taʼkidlandi.
Prezident, shuningdek, O‘zbekistonning Jahon savdo tashkilotiga aʼzo bo‘lishini qo‘llab-quvvatlagani uchun diplomatik missiyalar rahbarlari vakillik qilayotgan mamlakatlar hukumatlariga minnatdorlik bildirdi.
Marosim yakunida prezident yangi tayinlangan elchilarga sharafli va masʼuliyatli faoliyatida katta muvaffaqiyatlar tiladi, sheriklikni mustahkamlash uchun mavjud barcha imkoniyatlardan samarali foydalanishga chaqirdi, hududlar va xususiy biznes vakillari bilan faol hamkorlik qilishni tavsiya etdi.
