Putin Ukraina masalasida murosaga kelishni istamaydi
Rossiya yetakchisi o‘z pozitsiyasini o‘zgartirmoqchi emas.
Rossiya Prezidenti Vladimir Putin Ukraina bilan muzokaralarda hududiy talablar, tinchlikparvar kuchlar va mamlakatning betarafligi borasida murosaga kelishdan bosh tortmoqda. Bu haqida Bloomberg nashri o‘z maqolasida xabar berdi.
Manbaga ko‘ra, Rossiya yetakchisi o‘z pozitsiyasini o‘zgartirish niyatida emas va urushning tugash shartlari borasida jiddiy yon bosishga tayyor emas. Xususan, Putin Donetsk, Lugansk, Xerson va Zaporojye viloyatlarining Rossiya tarkibida qolishini qat’iy talab qilmoqda.
Bundan tashqari, Moskva Ukraina hududida tinchlikparvar kuchlarning joylashtirilishiga qat’iy qarshi chiqmoqda va Kiyevning betaraf maqomga ega bo‘lishi shartligini ta’kidlamoqda. Ushbu shartlar esa Ukraina va G‘arb davlatlari tomonidan qabul qilinishi qiyin bo‘lib, mojaroning davom etish ehtimolini oshirmoqda.
G‘arb ekspertlari Rossiyaning bunday qat’iy pozitsiyasi urushning uzoq davom etishiga olib kelishini taxmin qilmoqda. Shu bilan birga, Ukraina prezidenti Vladimir Zelenskiy Rossiya bilan muzokaralar faqat Kiyev uchun maqbul shartlar asosida bo‘lishi mumkinligini ta’kidlagan.
