Tesla aksiyalari bir kunda 15 foizga tushib ketdi
Bu Teslaning bozor qiymatiga sezilarli ta’sir ko‘rsatdi.
10-mart kuni Ilon Mask rahbarlik qilayotgan Tesla kompaniyasi aksiyalari 15 foizdan ko‘proq arzonlashib, dekabr oyida erishilgan barcha yutuqlarni yo‘qotdi. Donald Trampning 2024-yilgi AQSh prezidentligi saylovlaridagi g‘alabasidan keyin kompaniya aksiyalari tez o‘sishni boshlagan edi, biroq bu pasayish Teslaning bozor qiymatiga sezilarli ta’sir ko‘rsatdi.
Dekabr oyi o‘rtalarida Tesla aksiyalari 480 dollargacha yetib, eng yuqori cho‘qqiga chiqqan edi. O‘shanda bu ko‘rsatkich Trampning saylovoldi kampaniyasi davridagi narxdan ikki baravar yuqori bo‘lgan. Hozir esa aksiyalar narxi 222 dollar atrofida bo‘lib, kompaniyaning umumiy qiymati 1,5 trillion dollardan 715 milliard dollarga tushib ketdi.
Mutaxassislarning fikricha, bu pasayish Tesla aksiyalarining haddan tashqari oshirib baholanganligi va investorlarning ishonchsizlik kayfiyatiga tushib qolishi bilan bog‘liq. Shuningdek, bozorning umumiy holati va elektromobil sanoatidagi raqobat kuchayishi ham kompaniyaning aksiyalariga bosim o‘tkazmoqda.
Taqqoslash uchun, Ford kompaniyasining bozor qiymati hozirda 40 milliard dollar, General Motors esa 48 milliard dollar atrofida baholanmoqda. Tesla aksiyalarining keskin tushishi investorlar orasida kelajakda kompaniyaning barqarorligi borasida turli xavotirlarni kuchaytirdi.
