Buxoro aeroportida zargarlik buyumlari to‘xtatib qolindi
Ular orasida ko‘krak nishonlari ham bo‘lgan.
“Buxoro aeroporti” chegara bojxona posti va Aviatsiya xavfsizligi xizmati xodimlarining o‘zaro hamkorligida qimmatbaho metallardan yasalgan zargarlik buyumlari hamda madaniy boyliklarni noqonuniy ravishda xorijga olib chiqmoqchi bo‘lgan shaxs ushlandi.
Aniqlanishicha, Buxoro – Sankt-Peterburg yo‘nalishidagi aviareys orqali xorijga uchib ketmoqchi bo‘lgan fuqaro umumiy qiymati 165 million so‘m bo‘lgan zargarlik buyumlarini bojxona xodimining og‘zaki so‘rovida maʼlum qilmagan va yo‘lovchi bojxona deklaratsiyasida qayd etmagan.
Olib chiqish meʼyoridan ortiqcha bo‘lgan jami 37 dona, og‘irligi 226,04 gramm bo‘lgan zargarlik buyumlari hamda tarixiy ahamiyatga ega 16 dona ko‘krak nishonlari va tangalar aniqlanib, ashyo dalil sifatida vaqtincha saqlovga olindi.
Hozirda mazkur holat yuzasidan bojxona organlari tomonidan tegishli tartibda ish olib borilmoqda.
