Jizzaxda rulda uxlab qolgan haydovchi halokatga uchradi
U yo‘lni kesib o‘tib yuk mashinasiga borib urilgan.
Jizzax viloyati Sharof Rashidov tumanidan o‘tuvchi M39 yo‘lida fojiali yo‘l-transport hodisasi sodir bo‘ldi.
Viloyat YHXB ma’lumotiga ko‘ra, hodisa 13-mart kuni soat 06:50 da yuz bergan. Toshkent-Samarqand yo‘nalishida harakatlanayotgan Matiz avtomobili haydovchisi rulda uxlab qolib, yo‘lni ajratib turuvchi beton to‘siqqa urilgan va qarama-qarshi yo‘nalishga chiqib ketgan. Natijada u yuk avtomobili bilan to‘qnashgan.
Hodisa oqibatida Matiz haydovchisi og‘ir tan jarohatlari olib, voqea joyida vafot etgan. Holat yuzasidan tegishli organlar tomonidan surishtiruv ishlari olib borilmoqda.
