Fors ko‘rfazida “qonli yomg‘ir” hodisasi kuzatildi
Hodisa oroldagi gelak tuprog‘i bilan bog‘liq.
Fors ko‘rfazidagi sayyohlar noyob tabiiy hodisaga guvoh bo‘lishdi. Kuchli yomg‘irdan so‘ng, Erondagi Hormuz orolining qirg‘oq chizig‘i yorqin qizil rangga aylandi. Ijtimoiy tarmoqlarda “qonli yomg‘ir” aks etgan videolar keng tarqalib, plyaj bo‘ylab oqayotgan qizil suv oqimlari barchani hayratga soldi.
Mutaxassislarning fikriga ko‘ra, bu hodisa orolda ko‘p miqdorda temir oksidini o‘z ichiga olgan gelak tuprog‘i bilan bog‘liq. Yomg‘ir suvi qizil rangdagi tuproq bilan aralashgan holda qirg‘oq bo‘ylab oqib, g‘ayrioddiy manzarani yuzaga keltirgan. Quruq ob-havoda esa bu tuproq, ayniqsa quyosh botishi yoki chiqishi vaqtida yanada yorqinroq tovlanadi.
Hormuz oroli 70 dan ortiq foydali qazilmalar mavjudligi sababli “Kamalak oroli” deb ham ataladi. Uning Kumush va Qizil plyajlarida kuzatilgan ushbu hodisa sayyohlarni hayratga solib, ko‘plab surat va videolarning tarqalishiga sabab bo‘ldi.
