Qishloq xo‘jaligidagi xavflarni sug‘urtalash tizimi takomillashtirilmoqda
Tabiiy ofatlar oqibatida yetkazilgan zararlar endi sug‘urta bilan qoplanadi.
O‘zbekiston qishloq xo‘jaligi sohasidagi xavflarni kamaytirish va fermerlarning moliyaviy barqarorligini ta’minlash maqsadida Qishloq xo‘jaligi sug‘urtasi jamg‘armasi tashkil etiladi.
Senatning yalpi majlisida muhokama qilingan va ma’qullangan “Qishloq xo‘jaligi tavakkalchilarini sug‘urta qilish to‘g‘risida”gi qonun doirasida davlat tomonidan fermerlarga moliyaviy yordam ko‘rsatish mexanizmi ishlab chiqildi.
Yangi tartibga ko‘ra, qishloq xo‘jaligi sug‘urta mukofotining 50 foizini davlat qoplaydi. Bundan tashqari, sug‘urtalangan xo‘jaliklar tabiiy ofatlar yoki boshqa xavflar natijasida zarar ko‘rsa, jamg‘arma mablag‘lari yetarli bo‘lmasa, qolgan qismi respublika budjeti hisobidan qoplanadi.
Ushbu tashabbus iqlim o‘zgarishi, tabiiy ofatlar, zararkunandalar va bozor sharoitidagi o‘zgarishlar tufayli yuzaga keladigan moliyaviy yo‘qotishlarning oldini olishga xizmat qiladi. Shuningdek, hosilga yetkazilgan zararni baholash va sug‘urta hodisalari bo‘yicha kompensatsiyani mustaqil ekspertlar belgilashi ham nazarda tutilmoqda.
Qonun senatorlar tomonidan ma’qullandi va tez orada amaliyotga joriy etilishi kutilmoqda.
