Shavkat Mirziyoyev xalqaro maslahatchi Suma Chakrabarti bilan uchrashdi
Uchrashuvda iqtisodiy rivojlanish va boshqaruv bo‘yicha fikr almashildi.
O‘zbekiston Respublikasi Prezidenti Shavkat Mirziyoyev 19-mart kuni iqtisodiy taraqqiyot, samarali boshqaruv va xalqaro hamkorlik masalalari bo‘yicha maslahatchi Suma Chakrabartini qabul qildi.
Maslahatchining joriy yilgi faoliyatining asosiy yo‘nalishlari ko‘rib chiqildi.
Mamlakatimiz investitsiyaviy salohiyatini xalqaro maydonda yana-da ilgari surish, O‘zbekistonning Jahon savdo tashkilotiga aʼzo bo‘lish jarayonini yakunlash bo‘yicha amaliy choralar ko‘rish, xorijdagi yetakchi taʼlim muassasalarida davlat xizmatchilarining malakasini oshirish masalalariga alohida eʼtibor qaratildi.
Bo‘lajak O‘zbekiston investitsiya salohiyati “roud-shousi” va Toshkent xalqaro investitsiya forumini yetakchi xorijiy kompaniyalar va moliyaviy institutlarni jalb qilgan holda yuqori saviyada o‘tkazish muhimligi taʼkidlandi.
Uchrashuvda Raqamli texnologiyalar xalqaro markazi huzurida Toshkent xalqaro tijorat sudini ishga tushirishning amaliy jihatlari, mamlakatimizning xalqaro reytinglardagi o‘rnini mustahkamlash, iqtisodiy rivojlanish sohasida fundamental tadqiqotlar olib borish bo‘yicha birinchi navbatdagi chora-tadbirlarga to‘xtalib o‘tildi.
