Hindistonlik erkak o‘zini operatsiya qilishga urindi
U buni internetdagi videoga tayanib, amalga oshirmoqchi bo‘lgan.
Hindistonning Bihar shtatida yashovchi 32 yoshli Rajababu Kumar qorin og‘rig‘idan aziyat chekib, YouTubeʼdagi qo‘llanmalar asosida o‘z ko‘richagini mustaqil ravishda olib tashlashga uringan. U xonasida og‘riqsizlantirish vositalarini qo‘llab, qornining pastki qismini kesadi, biroq operatsiya muvaffaqiyatsiz yakunlanadi.
Og‘riq kuchayganidan so‘ng, Kumar jarohatni o‘zi tikishga harakat qiladi, ammo bu ham natija bermaydi. U oxir-oqibat oilasiga murojaat qilishga majbur bo‘ladi va qarindoshlari uni zudlik bilan shifoxonaga yetkazishadi. Shifokorlar uning jarohatini tikib, zaruriy tibbiy yordam ko‘rsatishgan. Hozirda u kattaroq tibbiy markazga o‘tkazilgan.
Kumarning yaqinlari uning bunday tavakkal qarorga kelishiga sifatli tibbiy xizmatdan foydalanish imkoniyatining cheklangani sabab bo‘lganini taʼkidlashdi. Mutaxassislar esa bunday xavfli tajribalar hayot uchun xavfli ekanini eslatib, bemorlarni har doim professional tibbiy yordamdan foydalanishga chaqirishmoqda.
