Qashqadaryoda 9 nafar IIB xodimi ishdan olindi
Bir guruh xodimlarga intizomiy jazolar qo‘llandi.
Ichki ishlar vaziri Aziz Toshpo‘latov Qashqadaryo viloyatida kompleks inspektorlik tekshiruvi natijalari yuzasidan hisobot yig‘ilishi o‘tkazdi. Yig‘ilishda sohaviy xizmatlar va hududiy IIB rahbarlari faoliyatida jiddiy kamchiliklar aniqlandi va shu asosda choralar ko‘rildi.
Xususan, viloyat IIB Maʼnaviy-maʼrifiy ishlar va kadrlar bilan taʼminlash xizmati boshlig‘ining o‘rinbosari, viloyat YHXX boshlig‘ining Maʼnaviy-maʼrifiy ishlar bo‘yicha o‘rinbosari, Ro‘yxatdan o‘tkazish va imtihon olish bo‘limi boshlig‘i, Ko‘kdala va Kitob tumanlari IIB boshliqlari, Koson va Kasbi tumanlari IIB boshliqlarining birinchi o‘rinbosarlari, Muborak tumani va Qarshi shahri IIB jamoat xavfsizligi xizmati bo‘yicha o‘rinbosarlari lavozimlaridan ozod etildi.
Shuningdek, viloyat IIB boshlig‘ining jamoat xavfsizligi bo‘yicha o‘rinbosari, Tergov boshqarmasi boshlig‘i, jamoat tartibini saqlash boshqarmasi boshlig‘i, yo‘l harakati xavfsizligi qidiruv-surishtiruv bo‘linmasi boshlig‘i va boshqa boshliqlarga keskin intizomiy jazolar qo‘llandi. Yig‘ilishda ichki ishlar organlari rahbarlarining shaxsiy javobgarligini oshirish va xizmat intizomi hamda qonunchilik talablariga qatʼiy rioya etilishini taʼminlashga qaratilgan choralar muhokama qilindi.
