Andijonda o‘quvchilarga shubhali konfet tarqatilyaptimi?
Tarmoqda tarqalgan xabarlarga izoh berildi.
Ijtimoiy tarmoqda Andijon viloyatining Oltinko‘l tumanidagi maktabda o‘quvchilarga nomaʼlum tarkibdagi konfet tarqatilayotgani haqida xabar tarqaldi.
IIV tomonidan aniqlanishicha, Oltinko‘l tumanidagi maktabning 3-sinf o‘quvchisi X.M. mazkur hududda joylashgan savdo do‘konidan ming so‘mga 3 dona konfet sotib olgan. Shundan so‘ng maktabga kelgan vaqtida sinfdoshi O.A. undan shirinlikni qayerdan olganligini so‘raganda, go‘yoki notanish shaxs berib ketganligini o‘ylab topib yolg‘on aytgan.
Maktab hamshirasi O.A. bolani gapidan xulosa qilib, ijtimoiy tarmoqlarga maktab atrofida shubhali konfetni maktab o‘quvchilariga nomaʼlum shaxslar berganligi haqidagi haqqoniy bo‘lmagan xabarni tarqatgan.
“Shuningdek, konfet isteʼmoli oqibatida bola nobud bo‘lganligi to‘g‘risidagi xabar ham mutlaqo haqiqatga ziddir”, deyiladi xabarda.
Hozirda mazkur holat yuzasidan tergovga qadar tekshiruv olib borilmoqda, konfetning tarkibida inson sog‘lig‘iga zararli moddalar bor yoki yo‘qligini aniqlash maqsadida sud-kimyoviy ekspertiza tayinlangan.
