Misrda 3600 yillik noma’lum fir’avn qabri topildi

 

Misr va Amerika arxeologlaridan iborat jamoa Nil daryosining chap qirg‘og‘ida joylashgan qadimiy Abidos shahrida taxminan 3600 yil oldin yashagan noma’lum fir’avnning qabrini topdi. Ushbu qabr 7 metrdan ortiq chuqurlikda joylashgan bo‘lib, uning ichida tonozli shiftga ega bo‘lgan bir nechta xonalar mavjud.

 

Arxeologlar yangi topilgan ushbu qabr 2014-yilda topilgan va Seneb-Kay ismli podshohga tegishli bo‘lgan qabr bilan o‘xshashligini ta’kidlashdi. Bu esa noma’lum fir’avn Abidos sulolasining dastlabki hukmdorlaridan biri bo‘lishi mumkinligini ko‘rsatadi. Amerika jamoasi rahbari Jozef Vegner ushbu kashfiyotni "Abidos sulolasi tadqiqotining yangi bosqichi" deb atadi.

 

Qabr Misrdagi eng qadimgi qirollik dafn joylaridan biri hisoblanadi. Unda bo‘yalgan devor bezaklari yaxshi saqlangan bo‘lib, kiraverishdagi devor rasmlarida qadimiy Misr ilohlari-Isis va uning singlisi Neftis tasvirlangan.

 

Arxeologlarning fikriga ko‘ra, qabr o‘tgan asrlar davomida jiddiy zarar ko‘rgan. U yerda saqlanib qolgan skelet qoldiqlari aniqlanmagan, shuningdek, qabr ichida taxminan 1700 yil oldin amalga oshirilgan talonchilik izlari ham bor. Fir’avnning ismi papirus tasmalarida yozilgan bo‘lsa-da, ularni o‘qish imkonsiz bo‘lib qolgan.

 

Jozef Vegnerning so‘zlariga ko‘ra, qabrda Senayib yoki Fir’avn Pantjeni ismli shoh dafn etilgan bo‘lishi mumkin. Bu kashfiyot qadimiy Misr tarixining hali o‘rganilmagan sahifalarini ochishda muhim ahamiyat kasb etadi.