Rossiya Ukrainaga yirik raketa va dron hujumini amalga oshirdi: sakkiz kishi halok bo‘ldi
Rossiya Ukrainaga 400 dan ortiq dron va 110 dan ziyod raketa uchirdi. Ularning 27 tasi ballistik raketalar bo‘lgan.

Rossiya 20-noyabrga o‘tar kechasi Ukrainaga keng ko‘lamli raketa va dron hujumlarini amalga oshirdi. Oqibatda sakkiz kishi halok bo‘ldi, o‘nlab odamlar jarohatlandi. Hujumlar energetika, temiryo‘l va transport infratuzilmasiga zarar yetkazdi. Bu haqda Reuters xabar berdi.
Ukraina prezidenti Volodimir Zelenskiyning ma’lum qilishicha, Rossiya hujumda 400 dan ortiq dron va 110 dan ziyod raketadan foydalangan. Ularning 27 tasi ballistik raketalar bo‘lgan.
Kiyevda Dnepr daryosining ikki qirg‘og‘ini bog‘lovchi Podilsko-Voskresenskiy, Darnitskiy va Pivdenniy ko‘priklariga zarba berilgan. Shahar meri Vitaliy Klichko aholiga ishga avtomobilda bormaslikni tavsiya qilgan.
Ukraina Harbiy-havo kuchlari Rossiyaning 380 ta droni, 79 ta qanotli raketasi va uchta ballistik raketasini urib tushirganini bildirdi.
Bosh vazir Sergiy Koretskiyning aytishicha, Kiyevda olti kishi halok bo‘lgan. Lvov shahridagi temiryo‘l vokzaliga qilingan hujumda yana ikki kishi halok bo‘lgan, kamida 10 kishi jarohatlangan.
Shuningdek, Dnipropetrovsk viloyatida dronlar turar joy binolariga urilishi oqibatida besh kishi, Xarkivdagi shifoxonaga berilgan zarbalar natijasida esa to‘rt kishi jarohatlangan.
Hujumlar oqibatida Kiyevning to‘rtta tumanida suv bosimi pasaygan. Shahardagi suv ta’minoti obyektiga zarba berilishi natijasida uch nafar xodim halok bo‘lgan. Ayrim hududlarda elektr ta’minotida ham uzilishlar kuzatilgan. Lvov, Zakarpatiya va Ivano-Frankivsk viloyatlarida favqulodda elektr uzilishlari joriy etilgan.
Reuters ma’lumotiga ko‘ra, Rossiyaning Ukrainaga hujumi Moskva Qrim ko‘prigiga berilgan zarbalar uchun javob qaytarishini bildirganidan keyin amalga oshirilgan. Rossiya prezidenti Vladimir Putin 19-noyabr kuni Ukraina Qrimni Rossiya bilan bog‘lovchi ko‘prikka shu hafta uchinchi marta zarba berganidan so‘ng keskin javob berishini aytgan edi.
Ukraina rasmiylari esa Rossiyaning Tatariston hududidagi “Drujba” neft quvuriga xizmat ko‘rsatuvchi neft haydash stansiyasiga hamda uchta ballistik raketa uchirish qurilmasiga zarba berilganini ma’lum qilgan.
Bundan tashqari, Polsha mudofaa vaziri Rossiyaning tungi hujumlari vaqtida mamlakat havo hududiga uchta obyekt kirganini, ular ehtimol ikkita raketa va bitta dron bo‘lganini bildirdi. U mazkur holatni Rossiya provokatsiyasi deb atadi.
Reuters xabarlarni mustaqil ravishda tasdiqlay olmaganini qayd etgan. Har ikki tomon tinch aholini nishonga olganini rad etadi.








