Rossiya NATO bilan urushga tayyorlanmoqda
Germaniya hisobotida Rossiyaning NATOga tahdidi haqida ogohlantirildi.
Germaniyaning Federal razvedka xizmati (BND) va Bundesverning yangi hisobotiga ko‘ra, Rossiya NATO bilan keng ko‘lamli urushga tayyorlanmoqda. Kreml G‘arb bilan munosabatlarni tizimli mojaro deb bilib, o‘z maqsadlariga erishish uchun kuch ishlatishga tayyor ekani qayd etilgan.
Hisobotda Rossiya 2030-yilga kelib yirik an’anaviy urushga to‘liq tayyor bo‘lishi mumkinligi ta’kidlangan. Litva maxsus xizmati VSDning baholashicha, hozircha Moskva butun alyansga hujum qila olmaydi, biroq cheklangan harbiy operatsiya orqali NATOning javob choralari qanchalik qat’iy ekanini sinab ko‘rishi mumkin.
Shuningdek, Rossiya armiyasining Ukrainadagi urushga qaramay, harbiy-havo kuchlari va flotining jangovar tayyorgarligi saqlanib qolayotgani ta’kidlangan. Ukraina urushi tugasa, Rossiya qo‘shinlari tezda Boltiqbo‘yi davlatlari chegaralariga o‘tkazilishi mumkin.
Rossiyaning harbiy xarajatlari 2025-yilda 120 milliard yevroga yetishi kutilmoqda, bu YAIMning 6 foizidan ko‘proqni tashkil qiladi. So‘nggi yillarda harbiy byudjet qariyb to‘rt baravarga oshgan. Kreml armiyani 1,5 million kishiga yetkazishni va NATO bilan chegaradagi harbiy texnika sonini 30–50 foizga oshirishni rejalashtirmoqda.
