Toshkent viloyatida noqonuniy yer savdosi fosh etildi
Hozirda holat yuzasidan tergov harakatlari olib borilmoqda.
Toshkent viloyati Bo‘stonliq tumanida noqonuniy yer oldi-sotdisi bilan bog‘liq qator holatlar aniqlandi. Davlat xavfsizlik xizmati va Bosh prokuratura huzuridagi Departament tomonidan o‘tkazilgan tezkor tadbir natijasida noqonuniy savdolarga aloqador shaxslar qo‘lga olindi.
Bo‘stonliq tumanida yashovchi, 1980 va 1988-yillarda tug‘ilgan ikki shaxs o‘zaro til biriktirib, bog‘dorchilik va uzumchilik shirkatiga tegishli 20 sotix yer maydonini xaridor nomiga rasmiylashtirib berish evaziga 230 ming AQSh dollari olgan vaqtlarida qo‘lga olindi. Shu yerning o‘zida ushbu yer uchastkasini o‘z mulki sifatida taqdim qilgan, 1964-yilda tug‘ilgan fuqaro ham noqonuniy bitim vaqtida qo‘lga tushdi.
Boshqa holatda, 1996-yilda tug‘ilgan shaxs qarindoshiga tegishli bo‘lgan, 2008-yilda tuman hokimligi tomonidan ajratilgan 36 sotix yer maydonini 150 ming AQSh dollariga sotishga uringan. Shuningdek, kadastr tizimida ishlovchi tanishlari orqali hujjatlarni rasmiylashtirish uchun qo‘shimcha 10 ming AQSh dollari talab qilgan. Natijada u 160 ming AQSh dollari olgan vaqtida dalillar bilan qo‘lga olindi.
Yana bir holatda, Toshkent shahrida yashovchi, 1992-yilda tug‘ilgan shaxs 72,6 sotix noturar yer maydonini 1 million 81 ming 740 AQSh dollariga sotishga kelishgan. Unga aloqador shaxslar bu yer uchastkasini turar-joy maqomiga o‘tkazib, ko‘p qavatli uy qurish uchun ruxsat olish evaziga qo‘shimcha 10 ming AQSh dollari talab qilgan. Tezkor tadbir davomida u 110 ming AQSh dollarini olgan vaqtida qo‘lga olindi.
Hozirda barcha gumonlanuvchilarga nisbatan jinoyat ishlari qo‘zg‘atilgan.
