Endi O‘zbekiston diplomlari Germaniyada tan olinishi mumkin
O‘zbekiston va Germaniya o‘rtasida ta'lim sohasidagi hamkorlikni mustahkamlashga qaratilgan uchrashuvlar o'tkazildi.
Joriy yilning 1-aprel kuni O‘zbekiston Respublikasi Investitsiyalar, sanoat va savdo vaziri o‘rinbosari Shohrux G‘ulomov Germaniyaning ta'lim va migratsiya sohasidagi mutaxassislaridan iborat delegatsiya bilan uchrashdi. Uchrashuvda O‘zbekiston va Germaniya o‘rtasidagi hamkorlikni yanada rivojlantirishga qaratilgan bir qator istiqbolli yo‘nalishlar muhokama qilindi.
Uchrashuvda delegatsiya tarkibida Germaniyaning hududiy savdo-sanoat palatalari direktorlaridan, shuningdek, GP Günter Papenburg AG kompaniyasi tomonidan tashkil etilgan investitsiya kompaniyalari rahbarlaridan iborat vakillar ishtirok etdi. Ular, ikki tomonlama aloqalarni kuchaytirish va iqtisodiy hamkorlikni kengaytirish bo‘yicha takliflar bildirgan.
Asosiy muhokama qilinadigan masalalar orasida:
O‘zbekiston yoshlarini ilg‘or texnologiyalarni o‘rgatish va keyinchalik ularni Germaniya korxonalarida ishga joylashtirishni nazarda tutuvchi qo‘shma loyihalar amalga oshirilishi;
Germaniyalik mutaxassislarga O‘zbekistonda mehnat faoliyatini amalga oshirish uchun imtiyozlar berish;
O‘zbekiston diplomlarining Germaniyada tan olinishi hamda O‘zbekiston oliy ta'lim muassasalari va kasb-hunar kollejlarining Germaniya Ta'lim vazirligining ANABIN ma'lumotlar bazasiga kiritilishi muhokama qilindi.
Shuningdek, Germaniyada o‘zbek mutaxassislariga va yoshlariga imkoniyatlar yaratish, ikki mamlakat o‘rtasidagi mehnat migratsiyasi va investitsiya sohasidagi hamkorlikni kengaytirish masalalari ham ko‘rib chiqildi.
