O‘zbekistonda yoqilgi-energiya resurslari ustidan nazorat kuchaytiriladi
Tumanlarda energiya samaradorligini oshirish bo‘yicha ishchi guruhlar tashkil etiladi.
Prezident Shavkat Mirziyoyevning “Yoqilgi-energiya resurslaridan noqonuniy foydalash va behuda sarflanishining oldini olish hamda energiya samaradorligini oshirish bo‘yicha chora-tadbirlarni takomillashtirish to‘g‘risida”gi qarori asosida, O‘zbekistonda yoqilgi-energiya resurslari ustidan nazorat kuchaytiriladi.
Qaror bo‘yicha, tumanlarda elektron platformalarni yangilash va ishchi guruhlar tuzish rejalashtirilgan. Har bir tuman (shahar)da energiya balansini ishlab chiqish va samarali bajarilishi, shuningdek, energiya tejash dasturlarini amalga oshirishga oid tuman (shahar)lararo idora guruhlari tashkil etiladi. Bu guruhlarning boshliqlari tuman (shahar) prokurorlari bo‘ladi.
Qarorning asosiy yo‘nalishlari quyidagilarni o‘z ichiga oladi:
Yoqilgi-energiya resurslaridan foydalanuvchi davlat nazoratini samarali tashkil etish va muvofiqlashtirish bo‘yicha umumiy va hududiy shtablarga qo‘shimcha vazifalar yuklanadi;
Tuman (shahar)lardagi idora-guruhlarning ustuvor vazifalari va faoliyat yo‘nalishlari tasdiqlanadi;
Har bir tuman (shahar)da energiya resurslarini tejash va tarmoqlardagi yo‘qotishlarni kamaytirish bo‘yicha rejalar asosida nazorat amalga oshiriladi.
Shu bilan birga, Bosh prokuratura va Energetika vazirligi hamda boshqa davlat tashkilotlari, jumladan, Raqamli texnologiyalar vazirligi, O‘zenergoinspeksiya, Bojxona qo‘mitasi, Soliq qo‘mitasi bilan birgalikda ikki oy muddatda nazorat va monitoring imkonini beruvchi elektron platformalarni takomillashtiradi. Vazirliklar va boshqa tashkilot rahbarlari esa energiya tejash ko‘rsatkichlarini platformalarda muntazam aks ettirib borish va bu ma’lumotlarning haqiqiyligiga javobgar bo‘ladi.
