Toshkent viloyatida bog‘cha tarbiyachisi bolalarni kaltakladi
Tarbiyachi bilan tuzilgan mehnat shartnomasi bekor qilingan.
Ijtimoiy tarmoqlarda Toshkent viloyatidagi bog‘chalardan birida tarbiyachining bolalarni kaltaklayotgani aks etgan video tarqalib, jamoatchilik orasida keng muhokamalarga sabab bo‘ldi. Holat yuzasidan Toshkent viloyati Maktabgacha va maktab ta’limi boshqarmasi rasmiy bayonot berdi.
Aniqlanishicha, voqea joriy yilning 2-aprel kuni Nurobod shahridagi xususiy oilaviy bog‘chada sodir bo‘lgan. Mazkur bog‘chada ishlayotgan tarbiyachi M.M. mashg‘ulot jarayonida bolalarga nisbatan qo‘pol munosabatda bo‘lgan. Uni bog‘cha rahbari videokuzatuv kameralari orqali aniqlagan.
Natijada tarbiyachi bilan tuzilgan mehnat shartnomasi bekor qilinib, u ish joyidan bo‘shatilgan. Ayni paytda holat yuzasidan shahar ichki ishlar bo‘limi tomonidan surishtiruv ishlari olib borilmoqda.
