Qo‘lbola usulda yog‘ ishlab chiqarish sexlari fosh etildi
Holat yuzasidan tergov harakatlari boshlangan.
Surxondaryo va Qashqadaryo viloyatlarida noqonuniy ravishda yog‘ ishlab chiqarayotgan yashirin sexlar aniqlandi. Bosh prokuratura huzuridagi Departament tomonidan o‘tkazilgan tezkor tadbirlar chog‘ida qo‘lbola usulda mahsulot tayyorlanayotgani maʼlum bo‘ldi.
Surxondaryoda “B.” MCHJ rahbari o‘z xonadonida yashirin sex tashkil etib, chigitdan yog‘ tayyorlayotgani fosh etildi. Uning uyidan 2,6 tonna chigit, 2 tonna yog‘, 40 litrlik idishlar va ishlab chiqarishda foydalanilgan boshqa vositalar ashyoviy dalil sifatida olindi.
Qashqadaryoda esa Chiroqchi tumanida yashovchi fuqaroning xonadonida ham shunday qonunbuzarlik aniqlandi. U juvoz uskunasida 114 litr yog‘ va 262 kg chigit tayyorlagan. Shuningdek, 3 ta dvigatel, 5 ta 200 litrlik idish va boshqa uskunalar musodara qilindi.
Har ikkala holat yuzasidan Jinoyat kodeksining 186-2-moddasi bo‘yicha jinoyat ishi qo‘zg‘atilib, tergov harakatlari boshlangan.
