Toshkentda aliment to‘lamay yashirinib yurgan erkak qo‘lga olindi
Alimentdan qochgan ota devor ortidan topildi.
Toshkent shahri Yashnobod tumanida uch nafar farzandini moddiy ta’minlashdan bo‘yin tovlagan ota uzoq muddatli qidiruvdan so‘ng o‘z uyining tashqi devori ortidan topildi. Bu haqda Majburiy ijro byurosi shahar boshqarmasi xabar berdi.
Ma’lum qilinishicha, M. Ulug‘bek tumanlararo sudining qaroriga asosan N.H. ismli erkakdan Sh.H. foydasiga uch nafar voyaga yetmagan farzandining ta’minoti uchun yarim ulush miqdorida aliment undirish belgilangan. Ammo u 2024-yil aprel oyidan buyon aliment to‘lashdan bosh tortib, yashirinib yurgan.
Qidiruv tadbirlari natijasida u yashirin ravishda yashayotgan joyi — uyining devorlari orasida aniqlanib, qo'lga olingan. Unga nisbatan hujjatlar rasmiylashtirilib, O‘zbekiston MJtKning 47-1-moddasiga asosan sudga yuborilgan.
Sud qarori bilan unga 15 sutkalik ma’muriy qamoq jazosi tayinlangan. Oradan ko‘p o‘tmay, uning qarindoshlari tomonidan 54 million 562 ming so‘mlik aliment qarzi to‘liq qoplab berilgan.
