Bo‘stonliqda tabiatga 4,5 mlrd so‘mdan ortiq zarar yetkazildi
Hududda ruxsatsiz qazish ishlari olib borilgan.
Toshkent viloyati Bo‘stonliq tumanida “Oqsoq ota” soyining qirg‘og‘ida noqonuniy qum-shag‘al qazib olish holati aniqlanib, tabiatga 4 milliard 504 million so‘mdan ortiq zarar yetkazildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Viloyat ekologiya boshqarmasi tomonidan o‘tkazilgan reyd davomida MAN yuk mashinasi va ekkavator yordamida maxsus ruxsatsiz qazish ishlari olib borilayotgani fosh etildi. Ushbu faoliyat tabiatni muhofaza qilish qonunlarini buzgan holda olib borilgani aniqlangan.
Mazkur holat yuzasidan yuk mashinasi vaqtincha jarima maydonchasiga joylashtirildi, to‘plangan hujjatlar esa Bo‘stonliq tuman prokuraturasiga taqdim etildi. Eslatib o‘tamiz, 2024-yil 17-yanvarda prezident qaroriga binoan, daryolarda bunday faoliyatga moratoriy e’lon qilingan bo‘lishiga qaramay, qonunbuzarliklar davom etmoqda.
