Qashqadaryoda tarbiyachi bolaga tasodifan qaynagan suv to‘kib yubordi
Holat yuzasidan prokuratura tomonidan tekshiruv boshlangan.
Qashqadaryo viloyati, G‘uzor tumanidagi 4-sonli davlat maktabgacha ta’lim tashkilotida tarbiyachi ayol tasodifan qaynagan suvni bolaga to‘kib yuborgan. Oqibatda bola tan jarohati olgan va zudlik bilan tez tibbiy yordamga yetkazilgan.
Viloyat Maktabgacha va maktab ta’limi boshqarmasi ma’lumotiga ko‘ra, voqea tushlik vaqtida bolalarni ichkariga olib kirish jarayonida yuz bergan. Tarbiyachi Sh.Y. va tarbiyalanuvchi N.M. tasodifan to‘qnashib ketgan, natijada qaynoq suv bolaning peshona va chap yonoq qismiga to‘kilgan.
Bola darhol DMTT hamshirasi tomonidan birlamchi tibbiy yordam olgan va shundan so‘ng otasi chaqirilib, tez yordam mashinasida G‘uzor tuman tez tibbiyot birlashmasiga olib borilgan. Tibbiy muassasada kerakli choralar ko‘rilgan.
Tibbiyot birlashmasi ma’lumotiga ko‘ra, bola va uning otasi keyinroq shifoxonani o‘z xohishiga ko‘ra tark etgan. Bolaning sog‘lig‘i tezroq tiklanishi uchun DMTT tomonidan moliyaviy yordam ham ko‘rsatilgan.
Hozirda beparvolikda ayblanayotgan tashkilot xodimlariga nisbatan xizmat tekshiruvi o‘tkazilmoqda. Shuningdek, G‘uzor tuman prokuraturasi ham voqeani qonuniy tartibda o‘rganmoqda. Natijalar haqida qo‘shimcha ma’lumot berilishi aytilgan.
Viloyat Maktabgacha va maktab ta’limi boshqarmasi bayonotida “Pedagog sha’niga dog‘ tushirayotgan, o‘z vazifasiga loqaydlik bilan qarayotgan har qanday xatti-harakat keskin qoralanishi” aytib o‘tilgan.
