Janubiy Koreyada shaklini o‘zgartiruvchi robot yaratildi
Ushbu robot tibbiyot va qutqaruv ishlarida qo'llaniladi.
Janubiy Koreyada olimlar haqiqiy "suyuq robot"ni yaratishga muvaffaq bo‘lishdi. Seul Milliy Universiteti va Gachon Universiteti tadqiqotchilari tomonidan ishlab chiqilgan ushbu innovatsion robot shaklini o‘zgartira oladi, tor bo‘shliqlardan o‘tadi va hatto kichik qismlarga ajralib, keyinchalik o‘z-o‘zidan birlashadi.
Bu texnologiya mashhur “Terminator 2” filmidagi T-1000 suyuq robotini eslatadi va aynan shu film mualliflarga ilhom manbai bo‘lgan.
Robotning asosiy materiali — suv o‘tkazmaydigan zarralar bilan qoplangan maxsus suyuqlik. Bu unga murakkab va tor joylarga kirib borish imkonini beradi. Uni tovush to‘lqinlari orqali boshqarish mumkin bo‘lib, u suv osti yoki qattiq yuzalarda harakatlana oladi.
Bu texnologiya tibbiyotda (masalan, aniq joyga dori yetkazish), favqulodda holatlarda (qutqaruv ishlarida) va mikro muhandislikda keng qo‘llanilishi mumkin. Olimlarning fikricha, bu kashfiyot kelajakdagi robototexnika rivojining yangi davrini boshlab beradi.
