O‘zbek milliy musiqa san’ati institutida Xalqaro ilmiy-amaliy konferensiya o‘tkazildi
Konferensiya madaniy aloqalarni chuqurlashtirishga xizmat qilishi kutilmoqda.
Bugun, 16-aprel kuni Yunus Rajabiy nomidagi O‘zbek milliy musiqa san’ati institutida “Maqom xonandaligi” kafedrasi tomonidan Sharq va G‘arb an’anaviy musiqasining umumiy va o‘ziga xos jihatlari, musiqiy janrlar va uslublarning uyg‘unlashuv jarayoni, madaniyatlararo aloqalar natijasida paydo bo‘lgan musiqiy yangiliklar va ularning xalq an’analari bilan o‘zaro bog‘liqligi, musiqiy an’analar o‘zaro ta’sirini kuchaytirgan omillar, mavjud muammolar va ularning yechimlariga bag‘ishlangan “Buyuk ipak yoʻli davlatlarida anʼanaviy musiqa: Sharq va Gʻarb madaniy aloqalari” mavzusidagi Xalqaro ilmiy-amaliy konferensiyasi o‘tkazildi.
Mazkur Xalqaro ilmiy-amaliy konferensiyada qo‘yidagi sho‘balar bo‘yicha maqolalar qabul qilindi:
- Buyuk ipak yoʻli davlatlarida anʼanaviy musiqa an’analar va janrlar transformatsiyasi.
- Sharq va G‘arb xalqlari musiqa madaniyatining o‘zaro integeratsiyasi;
- Madaniyatlararo hamkorlik natijasida shakllangan musiqiy innovatsion tendensiyalarning xalq an’analari bilan o‘zaro bog‘liqligi.
Shuningdek, Xalqaro ilmiy-amaliy anjumani doirasida ijrochilik maktablarining yirik namoyondalari tomonidan mahorat darslari o‘tkazildi. Ilmiy-amaliy konferensiya ishtirokchilari o‘zbek, rus va ingliz tillarida ma’ruza qildi. Ushbu Xalqaro ilmiy-amaliy konferensiyada 60 dan ortiq turdosh Oliy ta’lim muassasalari hamda Xalqaro ekspertlar ishtirok etdi.
Sharq va g‘arb xalqlarining an’anaviy musiqa madaniyatidagi o‘zaro integratsiyaning mohiyatini va ahamiyatini ilmiy asosda tadqiq etish, musiqiy an’analar, janrlar, uslublarning o‘zaro ta’sirini tahlil qilish hamda bu jarayonning madaniy rivojlanishdagi o‘rnini aniqlash maqsadida O‘zbekiston Respublikasi madaniyat va san’at xodimlari kuni munosabati bilan tashkil etilgan mazkur konferensiya xalqaro miqyosda madaniyatlararo muloqotni mustahkamlash, musiqiy merosni saqlash va targ‘ib qilishda muhim ahamiyat kasb etadi. Konferensiya musiqiy an’analar va ijodiy tajribalarni o‘rganish orqali yangi istiqbollar ochib, madaniy aloqalarni chuqurlashtirishga xizmat qilishi kutilmoqda.
