Toshkentda avtomobil haydovchilari o‘rtasida mojaro yuzaga keldi
Yo‘ldagi kelishmovchilik bezorilikka aylandi.
Joriy yilning 12-aprel kuni Yunusobod tumani, 13-mavzeda ikki haydovchi o‘rtasida yo‘l talashish ortidan janjal yuzaga kelgan. Dastlabki ma’lumotlarga ko‘ra, 1989-yilda tug‘ilgan Spark avtomobili haydovchisi M.X. va 2005-yilda tug‘ilgan Matiz avtomobili haydovchisi S.A. o‘zaro tortishib qolgan.
Janjal vaqtida M.X. avtomobilidan tushib, qo‘lida temir jism bilan “Matiz” avtomobilining oynalarini sindirgan. U, shuningdek, shu temir jism bilan haydovchi S.A.ga ham tan jarohati yetkazgan. S.A. olgan tan jarohati sababli tibbiyot muassasasiga murojaat qilgan.
Mazkur holat yuzasidan Yunusobod tumani IIO FMB huzuridagi Tergov bo‘limi tomonidan Jinoyat kodeksining 277-moddasi (Bezorilik) bilan jinoyat ishi qo‘zg‘atilgan. Hozirda tergov ishlari davom etmoqda.
