Dollar so‘nggi 3 yillikdagi eng past darajaga tushdi
Oltin esa yangi rekordlarni o‘rnatmoqda.
Jahon moliya bozorlarida dollarning zaiflashuvi fonida oltin narxi rekord darajada ko‘tarildi.
Spot oltin narxi 1,7 foizga oshib, bir unsiya uchun 3384 dollarni tashkil etdi. Bu oltin uchun butun tarix davomida eng yuqori narx hisoblanadi. Dollarning global valyutalar savdosidagi indeksi esa so‘nggi uch yildagi eng past darajaga tushib ketdi, bu esa oltinning qiymatini yana-da oshirdi.
Tahlilchilarning fikricha, AQSH va Xitoy o‘rtasidagi savdo tarangliklari, shuningdek, global iqtisodiyotda stagflyatsiya (o‘sish susayishi bilan birga inflyatsiya) xavfi oltin narxining ko‘tarilishiga asosiy omil bo‘lmoqda.
AQSH prezidenti Donald Tramp 2 aprel kuni o‘nlab mamlakatlarga “o‘zaro tariflar” joriy etilishini eʼlon qilgandi. Garchi ayrim davlatlarga nisbatan imtiyozlar berilgan bo‘lsada, Xitoy bilan savdo qarama-qarshiligi kuchayib bormoqda. Xitoy o‘zining iqtisodiy manfaatlarini himoya qilishini bildirgan va boshqa davlatlarni AQSH bilan bir tomonlama bitimlardan qaytargan.
Tramp, shuningdek, Federal zaxira tizimi raisi Jerom Pauellni tanqid ostiga olib, uning lavozimda qolish-qolmasligini ko‘rib chiqayotganini bildirgan.
