Ikkinchi jahon urushi qatnashchisi Rahmat Qobilov 100 yoshida vafot etdi
Rahmat Qobilov – xalq xotirasida mangu qoladigan qahramon.
Kattaqo‘rg‘on tumanining faxrli nuroniylaridan biri, Ikkinchi jahon urushi qatnashchisi Rahmat Qobilov 100 yoshida vafot etdi.
U 1925-yilda tug‘ilgan bo‘lib, yoshligidan og‘ir sharoitlarda mehnat qilgan. 17 yoshida frontga jo‘natilgan Qobilov 363-tankchilar diviziyasi tarkibida Polsha, Chexoslovakiya va Avstriya hududlaridagi janglarda jasorat ko‘rsatgan. Bir necha bor yaralangan bo‘lsa-da, safga qaytgan. Harbiy xizmatni 1950-yilgacha davom ettirgan.
U urushdan keyin kolxozda, elektr stansiyasida va aloqa sohasida mehnat qilgan. Oilali bo‘lib, 10 farzand ko‘rgan va yuzdan ortiq nevara-chevaralarning bobosi sifatida el e’tiboriga sazovor bo‘lgan.
Rahmat Qobilov tinchlik, halollik va mehnatsevarlik timsoli bo‘lib, yosh avlodga ibrat bo‘ldi. U hayoti davomida davlatimiz tomonidan urush faxriylariga ko‘rsatilgan hurmat-e’tibordan bahramand bo‘lib yashadi.
Ikkinchi jahon urushidagi g‘alabaning 80 yilligi arafasida bu ulug‘ insonning xotirasi xalqimiz qalbida abadiy saqlanadi. Marhumning oila a’zolari va yaqinlariga chuqur hamdardlik bildiramiz.
