Namangandagi bog‘chada tarbiyachi bolaning oyog‘ini kuydirib qo‘ydi
Shundan so‘ng muassasa faoliyati to‘xtatilgan.
Namangan viloyatida faoliyat yuritayotgan noqonuniy bog‘chada ro‘y bergan achinarli holat jamoatchilik orasida katta muhokamalarga sabab bo‘ldi. Ijtimoiy tarmoqlarda tarqalgan xabarlarga ko‘ra, bog‘cha tarbiyachisi 1,5 yoshli qizaloqning oyog‘ini kuydirib qo‘ygan.
Bola huquqlari bo‘yicha vakil (Bolalar ombudsmani) tomonidan o‘rganilgan holatga ko‘ra, voqea joriy yilning 23 aprel kuni Pop tumanida yuz bergan. Fuqaro R.M. o‘zining 2023 yil noyabrda tug‘ilgan qiz farzandini vaqtincha parvarish qilish uchun S.S. ismli ayolga topshirgan. Bir necha vaqt o‘tgach, farzandini olishga borganida bolaning oyog‘i kuyganini ko‘rgan.
Shifokorlar tomonidan bolaga vaqtida tibbiy yordam ko‘rsatilmagani aniqlangan va bu holat bolaning onasi bilan tarbiyachi o‘rtasida janjal kelib chiqishiga sabab bo‘lgan.
Namangan viloyati Maktabgacha taʼlim boshqarmasi xabariga ko‘ra, fuqaro S.F. Pop tumani “Bog‘” MFY hududida o‘z uyida davlat ro‘yxatidan o‘tmagan va litsenziyasiz tarzda taʼlim-tarbiya faoliyati bilan shug‘ullanib kelgan.
Hozirda noqonuniy bog‘cha faoliyati to‘xtatilgan bo‘lib, holat yuzasidan huquqiy baho berish uchun barcha tegishli hujjatlar huquqni muhofaza qiluvchi organlarga topshirilgan.
