Xitoyda rahbar xodimlarga yomon kayfiyatda ishga kelmaslikka ruxsat berdi
Gigant bo'lish shart emas, odam baxtli bo'lsa bas.
Xitoylik tadbirkor Yu Donglay o‘z kompaniyasi xodimlariga agar kayfiyatlari bo‘lmasa, ishga kelmaslikka ruxsat berdi.
Donglay boshqaruvidagi supermarketlar tarmog‘i xodimlarga 10 kunlik qo‘shimcha ta’til, shuningdek, ruhiy holat yomon bo‘lsa, dam olish imkoniyatini taklif qilgan. “Har kimning baxtsiz kunlari bo‘ladi. Agar o‘zingizni yaxshi his qilmasangiz — ishga kelmang”, — degan rahbar o‘z chiqishida.
Uning fikricha, bu qaror kompaniya uchun foydali, chunki kayfiyati yomon odam ishda xatoga yo‘l qo‘yishi, rejani buzishi yoki vazifalarni to‘g‘ri bajarmasligi mumkin.
Donglay tomonidan boshqariladigan korxona Xitoyda mashhur bo'lib, u har doim odamlarga ish o'rniga ustuvor ahamiyat beradi. Masalan ularda 40 kunlik ta’til amaliyoti ham yo‘lga qo‘yilgan.
“Biz gigant kompaniyaga aylanishga emas, balki sog‘lom va osoyishta hayot kechiradigan jamoa qurishga intilamiz. Shunda o‘z-o‘zidan kompaniya ham barqaror rivojlanadi,” — deya qo‘shimcha qilgan Donglay.
