AQShdagi restoranlardan birida ichimlik ichidan ilon chiqdi
Vahimaga tushgan mijoz restoranni tark etgan.
Virjiniya shtatining Sandston shahrida joylashgan “Patron Mexican Restaurant and Cantina” restoranida hayratomuz va dahshatli voqea yuz berdi. Karletta Endryus ismli ayol buyurtma qilgan kokteyldan ilon bolasi chiqib, uni hayratga soldi.
People nashrining yozishicha, ilon ichimlik ichida harakatlana boshlagan. Restoran xodimlari sudraluvchini tayoq yordamida olib tashlashga uringan, biroq bunga erisha olishmagan.
Muassasa rahbariyati Endryuga boshqa stolga o‘tishni taklif qilgan bo‘lsa-da, kuchli qo‘rquvga tushgan ayol restoranni zudlik bilan tark etgan.
