Toshkentda xizmatdagi YPX inspektorini mashina urib ketdi
Voqea yuzasidan tergov ishlari boshlangan.
23-aprel kuni ertalab soat 08:30 atrofida Toshkent shahrining Dormon yo‘li va Mirzo Ulug‘bek ko‘chasi kesishmasidagi chorrahada xizmat olib borayotgan yo‘l-patrul xizmati inspektorini Tracker rusumidagi avtomobil urib yubordi. Bu haqda tegishli idoralar xabar berdi.
Voqea tirbandlikning oldini olish uchun inspektor chorrahaning markazida tartibni nazorat qilayotgan vaqtda sodir bo‘lgan. Uning aytishicha, qaysi qatordan kelgani aniq bo‘lmagan Tracker to‘satdan kelib urgan.
Og‘ir tan jarohatlari olgan inspektor shifoxonaga yetkazilgan. Unga chap son suyagining bir necha joydan sinishi, chap tizza va oyoq sohasida lat yeyish, shuningdek, o‘ng va chap qo‘l teri shikastlanishi tashxisi qo‘yilgan.
Voqea joyida bo‘lgan boshqa xodimlar va Milliy gvardiya tezkor yordam ko‘rsatgan. Hozirda ushbu holat yuzasidan tergovga qadar tekshiruv ishlari olib borilmoqda.
