Navoiydagi savdo markazida yong‘in sodir bo‘ldi
Yong‘in oqibatida 200 kvadrat metr maydon yonib ketgan.
6-may kuni ertalab Navoiy viloyati Karmana tumanidagi “Arg‘un” mahallasida joylashgan savdo majmuasida yong‘in yuz berdi. Favqulodda vaziyatlar vazirligi ma’lumotiga ko‘ra, soat 05:15 da yong‘in haqida 112 raqamiga xabar tushgan. Qutqaruvchilar atigi uch daqiqada voqea joyiga yetib borishdi va yong‘inni soat 05:50 da qurshab olib, 06:24 da butunlay o‘chirib yuborishdi.
Yong‘in oqibatida savdo markazining 200 kvadrat metr maydoni va ichidagi tovarlar yonib ketdi. Hodisani bartaraf etishga 7 ta maxsus texnika jalb qilindi. Yong'inda jarohat olganlar yo‘q.
Eslatib o‘tamiz, yaqinda Toshkentdagi sintifon ishlab chiqarish sexida ham yong‘in bo‘lib, u yerda afsuski 2 kishi halok bo‘lib, 5 kishi jarohat olgandi.
